Barbulet blanco

Un barbulet blanco chikito a drenta inespera den cas. Masha calma e la sosega riba un portret den sala comedor. Cu su hala sera riba un portret caminda tin skirbi un poema bunita tocante Linschoten di Annets Alfabet, cual mi a laga traha un biaha. Cu trankilidad mi a tuma e hala nan cu mi duim y wijsvinger y laga e bay pafo atrobe, caminda e barbulet por sigui su caminda liber na su manera.

Tabata un momento particular, pero na e momento ey , e no tabata tanto significante pa mi. Te ora cu un hende, pa casualidad, algun dia despues a bisa mi e significado.

"Barbulet blanco ta nifica e presencia di un ser keri cu a fayece, cu awor ta cuida di bo, ta proteha bo of ta guia bo riba e caminda corecto!"

Mi no ta supersticioso, pero mi kere si cu segur tin mas entre cielo y tera. Pa algun hende, e vakantie aki ta un vakantie manera hopi otro, pero pa mi e momento tabata para. No ta facil. Especialmente ora bo mester perde un ser keri inespera. Esaki segur lo nunca por bira normal.

E ta unda mi tabata. Den algun momento, soledad, duele, tristesa y falta di su presencia. Pero awor, despues di algun dia, mi ta sinti un descanso. Pero tambe e sentimento di orguyo. Orguyo di por ta su yiu. Cu el a duna mi e norma nan y balor nan corecto y cu mi ainda lo aplica, defende y usa. Bo no tin masha hopi cos necesario pa hasi esey. E ontaktco, e bon momentonan cu nos a pasa hunto y e recuerdo nan ta hopi mas fuerte cu status, cudicioso, placa y poder. Placa ta hasi bida mas facil, pero sigur e no ta duna felicidad.

Awor mi ta mira tur cos hopi cla. Despues di hana hopi sosten di famia, amigonan y conocedo nan, mi a mira cu morto ta trese contacto atrobe entre hende, cual mi prome no tabata kere ta posibel. Esaki ta hasi esaki masha bunita, pasobra den algun momento e discusion nan y/of confrontacion nan ta desaparese y ta laga luga pa reconciliacion, comprension, aceptacion y respet. Cu den mayoria caso, un distancia saludabel.

Ademas mi ta mira cu tur mi palabra skirbi, ta manera un momento pa reflecta y siña pa mi mes, pero tambe pa otro hende. Pa nos por siña y hanja forsa di dje. Pa nos por acepta nos fayonan y por siña for di nan. Pasobra kiko awor ta keda masha claro ta e hecho cu bida por ta asina cortico.

Pa motibo di e dolor di pasado, ta bira dificil pa mi den algun momento pa recupera e confiansa atrobe y probecha e bida segun lo posibel. Pakiko tin asina hopi mal na mundo? Pakiko ta asina importante pa algun hende di tin status, placa, poder y prestigio, cu nan ta keda cla pa pasa riba otro. Loke ta hasi mi mas fuerte awor, pa mi conviccion, ta e hecho cu nos mester bay na oracion pa nan, trata di perdona nan y duna nan bendicion. Aunke pa algun hende e accion aki ta incomprendibel. Tambe esaki no ta facil. Spera cu nan ta bay cambia y ta realisa cu bo por logra meta nan tambe di un manera honesto. Lo bo mira cu bo lo experencia mas sosiego y lo bo nota cu nos tur na e mundo ta insignificante.

Cu orguyo y trankilidad, nos ta stipula nos futuro y ta trata di mira e cos positivo den mundo. Un mundo unda lamentablemente no semper ta evidente pa tur hende pa kier ta honesto y corecto. Nos mester sigui lanta contra esaki, pa cada biaha duna oido y expresa critica. Pa traha riba esaki di un manera consehabel, comprensivo y positivo. Pa spera cu mundo, aunke sea cu paso chikito, lo bira un mundo mehor pa cada un di nos. Dor di un barbulet blanco mi ta sinti e presencia, cual lo cuida mi, proteha mi y ta guia mi riba e caminda corecto.