Ronde di Aruba, e desafio mas grandi na e isla!

"Espera cu e experiencia aki no solamente ta un desafio deportivo, sino tambe un momento di crecemento personal, unidad y alegria cu lo keda graba na memoria pa hopi tempo."  - J. de Rover - Sergeant di mariniers / Hefe di Deporte na Kazerne di Savaneta (Den e buki di programa di Ronde di Aruba)

Ronde di Aruba ta consisti di ta e event di coremento, cu ta pasa den henter e isla y ta pasa den algun bario mas impresionante di Aruba. E largura eksakto di e ronde ta 72 kilometer. En total tin shete puesto di cambio, unda cada miembro di e team mester cambia su compañero di team y sigui e ronde su so. E resto di e miembronan di e team, hunto cu un of dos driver, kende no ta participante, ta bai dilanti dje. Den un vehiculo tun hopi biaha un matras, un coolbox, cuminda y bebida y riba dak di e vehiculo hopi biaha un speaker pa stimula e coridor cu musica.

Si mi por compara e ronde aki, mi ta compar'é cu e Elfstedentocht di Hulanda. Awor, e no ta 200 kilometer cu mester cubri, pero cu e 72 kilometer cu algun corredor ta core den nan so den un anochi, esaki ta un fenomeno extraordinario. Mi tabata mira cu admiracion e obra di e corredora femenino A. Nicolaas kende a core e ruta su so. Esey si ta un obra extraordinario!

Aña pasa mi no a participa, pero si ta sinta banda di e driver pa guia un grupo di cuater, caminda mi ruman muhe tabata den e grupo. Asina, mi a hanja un impresion tremendo di e evento aki. Mi a bisa na e momento ey cu si mi por haya e oportunidad, mi segur lo kier hasi e ronde aki un biaha cu un grupo di cuater.

Desafio deportivo

Mi no tabata core pa hopi tempo. Na cuminsamento di e aña aki, mi a cuminsa core hunto cu mi tio. Algun kilometernan, mandarinas/appel y litronan di sodo mas despues. Cu sapatonan nobo di core, un tiki sanger, hopi sodo, algun lagrima y algun kilo menos, mi tabata cla pa enfrenta un reto nobo. Nos grupo tabata consisti di mi tio, ruman muhe y sobrina y nos a wordo selecta for den e cantidad grandi di inscripcion pa participa. "Nic Haul Ass", team Nicolaas tabata nos nomber di grupo, idea di tio. Awor tabata nos reto pa enfrenta e desafio deportivo aki. Esey tawata un experiencia!

Crecemento personal

Mi mester a bin di leu. Mi condicion tabata abou, pero mi a core hunto cu mi tio na momento nan cu nos a palabra. Mi ta pensa cu sigur algun aña pasa mi no tabata cla pa hasi algo asina. Despues di tur e miseria y e morto di mi tata cu tawata inespera, esaki tabata ainda den mi memoria y e no tabata semper positivo. Pero sigur cuminsamento di e aña aki mi a mira tur cos mas positivo atrobe y mi no mester tin berguensa di kiko mi tabata. Mi no a hasi nada malo! Mi ta simplemente honesto, sincero y husto. Cu mi curason na e luga corecto. Cu Dios na mi banda. Mi tabata un tempo sigur no mi mes, pero awor mi ta sinti cu mi ta un hende nobo y mi ta nota cu mi personalidad mes ta regresa. Ronde di Aruba segur a yuda bou di esaki. Awor mi sinti mi mes mas fuerte cu nunca! Mi tata segur a por wak tur cos for di den cielo. Segur e ta sinti hopi orguyoso di nos.

Unidad y alegria

Durante e ronde bo ta sinti e unidad den bo team. Nan ta stimula bo y yuda bo si bo a core bo parti di e ronde y bo mester haña un momento pa descansa den vehiculo. Tambe durante e coremento ta wordo stimula dor di otro partisipante y e organisador nan, cu ta hasi cu bo ta core mas lihe tambe. Aparentemente, no ta bay realmente tocante pa gana, participacion ya ta un experencia. Tambe e driver nan ta duna bo e motivacion nesesario dor di nan musica. Tambe pa e driver nan aki ta un desafio pa ta alerta na tur momento, specialmente den e luganan brutu di Aruba banda noord. Kiko un experencia tabata esaki pa core meimei den oranan di madruga, cu e strea nan bunita na e sielo, den tur silencio den Arikok. Riba e ruta den Arikok no ta permiti pa pone musica y ta e silencio cu ta domina. Cu solamente e sonido di wiel nan di e vehiculo y e sonido di e santo cu e coredo nan ta core riba dje. Den Arikok mes un mariposa blanco tabata bula asina suave pasando pa dilanti di mi ruman muhe y esey tabata esencial pa nos sa cu nos tata tabata cu nos!

Tambe durante e ronde bo ta wordo stimula dor di e publico, cu ta banda di e caminda. Mi mes no tabata pensa cu tin asina hopi hende banda di e caminda, specialmente na San Nicolaas! Tur ta para banda di caminda cu entusiasmo y alegria. Y tur esaki bon prepara cu nan stoel, coolbox, luz,  bel nan di baka na man y cu musica. Kiko un bista tremendo esaki tabata pa wak bo famianan, amigonan y conosi ta ked abanda di caminda. Esaki a e motibo cu bo ta hanja e forsa interno pa core ainda mas lihe.

Recuerdo

Kiko un admiracion mi tin pa e hendenan cu a completa e ronde aki. Kiko un admiracion mi tin ainda mas pa mi tio, ruman muhe y sobrina. Specialmente pa mi tio, kende durante su ronde mes a core pasa un marinier. Tabata un honor y un privilegio pa por core e ultimo meter nan den su sombra y asina por hanja e meta. E ultimo parti ta mas pisa, pero ora tur hunto ta pasa e lint di meta, e satisfaccion ta inmensamente grandi y hende por papia solamente cu entusiasmo tocante e evento aki cu a keda exitoso. E evento aki semper lo keda graba den mi recuerdo y awor lo bira parti di mi momento nan agradabel nobo. Segur e ta smaak pa mas. Spera te proximo aña!